លោក ប្រាក់ សុវណ្ណ អភិបាលខេត្តព្រះវិហារ នៅព្រឹកថ្ងៃទី១៥ ខែតុលា ឆ្នាំ២០១៩ នេះ បានដឹកនាំមន្ត្រីរាជការ គ្រប់មន្ទីរ ស្ថា ប័នជុំវិញខេត្ត ធ្វើពិធី រំឮកគោរពព្រះវិញ្ញាណក្ខន្ធ ព្រះករុណា ព្រះបាទ សម្តេច ព្រះនរោត្តម សីហនុ ព្រះបរមរតនកោដ្ឋ គម្រប់ ខួប៧ឆ្នាំ (១៥ តុលា២០១២-១៥ តុលា ២០១៩) នៅសាលប្រជុំធំសាលាខេត្ត ។លោក ប្រាក់ សុវណ្ណ បានមានប្រសាសន៍លើកឡើងថា យើងទាំងអស់គ្នាបានមកជួបជុំគ្នានៅពេលនេះ គឺដើម្បីប្រារព្វ ពិធីគោ រពព្រះវិញ្ញាណក្ខន្ធ ព្រះករុណា ព្រះបាទ សម្តេចព្រះ នរោត្តម សីហនុ ព្រះមហាវីរៈក្សត្រ ព្រះវរៈរាជបិតា ឯករាជ្យបូរណភាព ទឹក ដី និងឯកភាពជាតិខ្មែរ ព្រះបរមរតនៈកោដ្ឋ ដែលព្រះអង្គបានយាងចូលទិវង្គត់ កាលពីថ្ងៃទី១៥ ខែតុលា ឆ្នាំ២០១២ ពោលគឺ អស់រយៈកាល ៧ឆ្នាំកន្លងទៅហើយ ។ ថ្ងៃនេះកាលពី ៧ឆ្នាំមុន ព្រះមហាវីរៈក្សត្រជាទីស្រឡាញ់ដ៏ខ្ពង់ខ្ពស់បំផុត នៃយើង បាន ឃ្លាតកាយ ទៅកាន់ទីដ៏សែនឆ្ងាយ គ្មានថ្ងៃត្រឡប់វិលវិញឡើយ សម្រាប់ប្រជានុរាស្រ្តជាទីស្រឡាញ់របស់ព្រះអង្គ ។លោកអភិបាលខេត្តបានបន្តថា ប្រជានុរាស្ត្រទូទាំងនគរ បានសម្តែងនូវការតក់ស្លុតព្រម នឹងការសោកស្តាយជាពន់ពេក ប្រៀប បានទៅនឹងការបាត់បង់របស់ដ៏មានតម្លៃ មិនអាចកាត់ថ្លៃបាន សម្រាប់នគរដ៏កំសត់មួយនេះ ។ កាលព្រះអង្គគង់នៅមានព្រះ ជន្ម ព្រះអង្គបានលះបង់កម្លាំងកាយចិត្ត និងប្រាជ្ញាស្មារតី ស្ទើរពេញមួយជីវិត បំពេញព្រះរាជបូជនីយកិច្ច ដើម្បីប្រយោជន៍ ប្រជានុរាស្ត្រ និងនគរទាំងមូល ដោយឥតរុញរា និងគ្មានការចុះញ៉មចំពោះឧបសគ្គទាំងឡាយដែលបានកើតឡើង ។ រាល់ព្រះរាជសកម្មភាពរបស់ព្រះអង្គ បានក្លាយជាសច្ចៈធម៌ ប្រវត្តិសាស្ត្រ ដែលគ្មាននរណាអាចបដិសេធន៍ និងកែប្រែ បាន ឡើយ។ប្រជានុរាស្ត្រទូទាំងនគរ ពិតជានៅចងចាំបាននូវព្រះរាជបូជនីយកិច្ចសំខាន់២ ដែលប្រវត្តិសាស្ត្របានកត់ត្រាទុក និងគ្មានថ្ងៃ បំភ្លេចបាននោះ គឺការទាមទារបានមកវិញនូវឯករាជ្យភាព ពីអាណានិគមន៍បារាំង ថ្ងៃទី៩ វិច្ឆិកា ១៩៥៣ និងការទាមទារបាន មកវិញ នូវភាពជាម្ចាស់ស្របច្បាប់ ទៅលើប្រាសាទព្រះវិហារនាថ្ងៃទី ១៥ មិថុនា ១៩៦២ ដែលជាមូលដ្ឋានដ៏សំខាន់ នាំឲ្យ ប្រាសាទព្រះវិហារ ត្រូវបានដាក់បញ្ចូលជាសម្បត្តិបេតិកភ័ណ្ឌពិភពលោកនៅពេលក្រោយមក ពោលគឺនៅថ្ងៃទី៧ កក្កដា ២០០៨ កន្លងទៅ ។សូមជម្រាបថា សម្តេចព្រះ នរោត្តម សីហនុ ព្រះមហាវីរៈក្សត្រខ្មែរ បានប្រសូត្រនៅថ្ងៃ១១កើត ខែកក្តិក ឆ្នាំច ចត្វាស័ក ព.ស ២៤៦៥ ត្រូវនឹងថ្ងៃទី៣១ ខែតុលា ឆ្នាំ១៩២២ ហើយព្រះអង្គយាងសោយព្រះទិវង្គត់ នៅវេលាម៉ោង១ និង២០នាទីរំលងអធ្រាត្រ ឈានចូលថ្ងៃទី១៥ ខែតុលា ឆ្នាំ២០១២ (ម៉ោងនៅក្នុងប្រទេសកម្ពុជា) ក្នុងព្រះជន្មាយុ៩០ព្រះវស្សា ដោយព្រះជរាពាធ នៅមន្ទីរ ពេទ្យ នាទីក្រុងប៉េកាំង ប្រទេសចិន ។សម្តេច ព្រះនរោត្តម សីហនុ គឺជាឥស្សរៈជន លេចធ្លោបំផុតក្នុងឆាកនយោបាយកម្ពុជា ក្នុងរយៈកាលប្រមាណជា ៧ ទសវត្ស កន្លងទៅ ព្រះអង្គឡើងគ្រងរាជបល្ល័ង្ក ជាព្រះមហាក្សត្រខ្មែរ រហូតដល់ទៅ ២លើក ហើយបានដាក់រាជ្យ ២លើក សម្តេច ព្រះនរោត្តម សីហនុ គឺជាតួអង្គ និងជាសាក្សី ដ៏ចម្បងបំផុត នៃប្រវត្តិសាស្រ្តខ្មែរសម័យទំនើប រាប់ចាប់តាំងពីកម្ពុជា ស្ថិត ក្រោមអាណានិគមបារាំងសម័យរុងរឿង ក្រោយឯករាជ្យទំព័រខ្មៅងងឹត នៃរបបខ្មែរក្រហម រហូតដល់យុគៈសម័យសន្តិភាព ការផ្សះផ្សារជាតិ និងការបង្កើតរបបរាជានិយម អាស្រ័យរដ្ឋធម្មនុញ្ញ នៅក្នុងទសវត្សរ៍ទី ៩០៕
ព័ត៌មានគួរចាប់អារម្មណ៍
សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសន្និបាតបូកសរុបលទ្ធផលការងារឆ្នាំ ២០២៣ និងលើកទិសដៅការងារឆ្នាំ ២០២៤របស់អាជ្ញាធរជាតិប្រយុទ្ធប្រឆាំងគ្រឿងញៀននិងផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៩ (រស្មីសៀមរាប)
តើយុត្តិធម៌មានសម្រាប់ប្រជាពលរដ្ឋទន់ខ្សោយ ស្លូតត្រង់ដែរឬទេ? ឬក៏មានសម្រាប់តែក្រុមបក្សពួកអ្នកមានអំណាចនិងមានលុយ? (រស្មីសៀមរាប)
ល្បែងស៊ីសងបញ្ចូលមាន់និងបៀរការ៉ាត់ជ្រកក្រោមស្លាកយីហោយៀក ថៃកំពុងបើកលេងយ៉ាងពេញបន្ទប់នៅក្នុងសង្កាត់ទន្លេបាសាក់មន្ត្រីមានសមត្ថកិច្ចក្នុងខណ្ឌចំការមន ហាក់សំងំស្ងៀមមិនមានការបង្ក្រាប ផ្គើននិងបទបញ្ជារបស់សម្ដេចតេជោហ៊ុន សែន សង្ស័យជាបានទទួលលាភសក្ការៈពីរដង្ខៅបនល្បែងស៊ីសងខុសច្បាប់នេះហើយមើលទៅ (ស្មីសៀមរាប 090567006)
ល្បែងស៊ីសងបញ្ចូល់មាន់និងបៀរការ៉ាត់ជ្រកក្រោមស្លាកយៀក ថៃ របស់ឈ្មោះ រតនា នៅសង្កាត់ទន្លេបាសាក់ខណ្ឌចំការមនបើកលេងយ៉ាងរលូន មន្រ្តីមានសមត្ថកិច្ចនៃអធិការដ្ឋាននគរបាលខណ្ឌចំការមនរក្សាភាពស្ងៀមស្ងាត់មិនធ្វើការបង្ក្រាប សង្ស័យជាត្រូវថ្នាំសណ្ដំហើយមើលទៅ! (ស្មីសៀមរាប 090567006)
វីដែអូ
ចំនួនអ្នកទស្សនា