សេចក្ដីរាយការណ៍ច្បាស់ការមួយបានឲ្យដឹងថា លោកប្រធានការិយាល័យគយ និងរដ្ឋាករ បន្ទាយចក្រី ស្ថិតនៅភូមិកគោ ឃុំបន្ទាយចក្រី ស្រុកព្រះស្តេច ខេត្តព្រៃវែង បានឃុបឃិតជាមួយឈ្មូញហេីយបើកឲ្យមានទំនិញនាំចូលមកកម្ពុជាយ៉ាងគក្រឹកគក្រងជាទីបំផុត ទំនិញទាំងនោះរួមមាន: ត្រី​ សាច បន្លែ​ គ្រឿងទេស ។ល។ សុទ្ធសឹងទំនិញគ្មានប្រភពច្បាស់លាស់ ទំនិញបន្លំពន្ធ និងទំនិញមានផ្ទុកសារជាតិគីមី នាំចូលមកប្រទេសកម្ពុជា យ៉ាងគក្រឹកគក្រេងនិងបើកចំហរ ដោយគ្មានការត្រួតពិនិត្យឲ្យបានត្រឹមត្រូវនោះទេ ហើយនៅពេលឈ្មួញដឹកទំនិញចូលមកគឺគ្រាន់តែហុចកញ្ចប់មួយឲ្យទៅមន្ត្រីគយប្រចាំច្រកទ្វាព្រំដែនអន្តរជាតិបន្ទាយចក្រីទៅគឺបានហើយ បន្ទាប់មកពួកគេក៏បើកកុងត្រូលឲ្យឈ្មួញទាំងនោះដឹកទំនិញចូលយ៉ាងរលូនតែម្ដង ។

មន្ត្រីក្នុងស្ថាប័នយគមួយរូបដែលសុំមិនបញ្ចេញឈ្មោះបានលួចបង្ហេីបឲ្យដឹងថា លោកប្រធានការិយាល័យគយ និងរដ្ឋាករប្រចាំច្រកអន្តរជាតិបន្ទាយចក្រី ស្ថិតនៅភូមិកគោ ឃុំបន្ទាយចក្រី ស្រុកព្រះស្តេច ខេត្តព្រៃវែង ​សព្វថ្ងៃកំពុងតែស្បាយដៃយ៉ាងខ្លាំងក្នុងការប្រមូលលុយចូលហោប៉ាវដោយមិនខ្វល់ពីផលប៉ះពាល់លេីចំណូលជាតិឡេីយ ព្រោះតែសកម្មភាពពុករលួយបានកេីតឡេីងយូឆ្នាំណាស់មកហេីយ ហេីយការឃុបឃិតជាមួយឈ្មូញ​​​​ដោយរាប់ក្បាលឡានយកលុយ វាក៏ជាវប្បធម៌របស់មន្ត្រីគយដែលនៅទីនេះទៅហេីយ តេីយូណាស់ហេីយមន្ត្រីថ្នាក់លេីមិនអើពើសូម្បីអ្វីបន្តិចសោះ?

ជាក់ស្តែងនៅថ្ងៃទី២១ ខែ​មិថុនា ឆ្នាំ២០១៩ ក្រោយទទួលការរាយការណ៍របស់បងប្អូនប្រជាពលរដ្ឋ ដែលបានទទូចសុំអោយក្រុមអ្នកសារព័ត៌មានចុះទៅដល់ទីតាំងថតផ្តិតរូបភាពជាក់ស្តែងពិតប្រាកដ ដេីម្បីចុះផ្សាយការពិតជូនប្រមុខថ្នាក់ដឹងឲ្យលោកបានជ្រាប ប៉ុន្តែបន្ទាប់ពីចុះដល់ទីតាំងរួចហេីយ អង្គភាពយេីងព្យាយាមទំនាក់ទំនងទៅលោកមេគយប្រចាំច្រកអន្តរជាតិចក្រីនេះ​ ដេីម្បីសុំការបំភ្លឺលេីបញ្ហាខាងលេី ប៉ុន្តែមន្ត្រីគយក្នុងការិយាល័យគយ និងរដ្ឋាករ ប្រចាំច្រកនេះមិនអនុញ្ញាតឲ្យចូលជួបឡេីយ ហេីយក៏មិនអេីពេីចំពោះការចុះយកព័ត៌មានរបស់ក្រុមអ្នកសារព័ត៌មាននោះឡេីយ។

មន្ត្រីក្នុងមូលដ្ឋានបានប្រាប់ឲ្យដឹងថា លោកប្រធានការិយាល័យគយ និងរដ្ឋារក​ ប្រចាំច្រកអន្តរជាតិចក្រី​​ ហ៊ានធ្វេីបែបនេះដោយសារតែមានលោក ប្រធានសាខាគយ និងរដ្ឋាករខេត្តព្រៃវែងនៅពីក្រោយខ្នង ហេីយក្រោមសកម្មភាពពុករលួយដ៏គក្រឹកគក្រេងនេះ ក៏មានការបែងចែងជាកញ្ចប់ទៅឲ្យលោក ប្រធានសាខាគយ និងរដ្ឋាករខេត្តព្រៃវែងនេះផងដែរ ទេីបអាចឲ្យលោកប្រធានការិយាល័យគយ និងរដ្ឋាកររូបនេះ​ សម្ងំកេីបលុយយ៉ាងសុខស្រូលបែបនេះបាន។

សេចក្ដីរាយការណ៍បានបន្តឲ្យដឹងថា គេតែងតែឃើញមានទំនិញចូលមកយ៉ាងច្រើនកុះករ ប៉ុន្តែពួកគេមិនដែលឃើញលោកប្រធានការិយាល័យគយ និងរដ្ឋាកររូបនេះចេញក្រៅការិយាល័យ ហេីយធ្វេីការត្រួតពិនិត្យទំនិញទាំងនោះទេ គឺមានត្រឹមតែមន្ត្រីគយពីទៅបីរូបប្តូរវេនគ្នាអង្គុយចាំយកតែលុយតែប៉ុណ្ណោះ។

មន្ត្រីគយប្រចាំច្រកអន្តរជាតិចក្រី​មួយរូបបានប្រាប់ឲ្យដឹងថា គេមិនខ្លាចការផ្សព្វផ្សាយរបស់អ្នកសារព័ត៌មាននោះឡេីយ ទោះបីជាជួលឲ្យបីតាបណ្ឌិតសារព័ត៌មានមកថតផ្តិត ផ្សាយយ៉ាងណាទៀតក៏គាត់មិនខ្វល់ដែរ សំខាន់រូបគាត់អនុវត្តតាមមេគយប្រចាំច្រក មេបង្គាប់យ៉ាងមុិច គឺគាត់ធ្វេីបែបនោះហេីយ។

ពាក់ព័ន្ធនឹងករណីខាងលើ​នេះ បងប្អូនប្រជាពលរដ្ឋសូមសំ​ណូមពរដល់លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា​​ និងលោក​ អូន ព័ន្ធមុនីរ័ត្ន រដ្ឋមន្ត្រីក្រសួង​សេដ្ឋកិច្ចនិងហិរញ្ញវត្ថុ ជាពិសេសលោក ឱម យុិនទៀង ប្រធានអង្គភាពប្រឆាំងអំពើពុករលួ​យ​​ គួរ​ពិនិត្យឡើងវិញជាបន្ទាន់ចំពោះភា​ពមិនប្រក្រតី​របស់លោកប្រធានការិយាល័យគយ និងរដ្ឋាករ​ ប្រចាំច្រកអន្តរជាតិចក្រីនេះផងទាន ពុំដូចច្នេះទេ ការនាំទំនិញមានផ្ទុកសារជាតិគីមី​ និងកាន់តែមានសណ្ឋានធំជាងមុនទៅទៀត។

ជុំវិញបញ្ហាខាងលើនេះ អង្គភាពយើងមិនអាចទំនាក់ទំនងទៅលោកប្រធានការិយាល័យគយនិងរដ្ឋាករ ច្រកអន្តរជាតិចក្រី​​ ដេីម្បីសុំការបំភ្លឺបានទេនៅពេលនេះ ព្រោះពុំមានលេខទូរស័ព្ទ ៕