(កំពង់ស្ពឺ) យុវជនម្នាក់ក្នុងចំណោមបក្ខពួកបីនាក់ត្រូវបានកម្លាំងនគរបាលធ្វើការឃាត់ខ្លួនបញ្ជូនមកកាន់អធិការដ្ឋាននគរបាលស្រុកបសេដ្ឋ ក្រោយធ្វើសកម្មភាពស្ទាក់ប្លន់យកម៉ូតូពីយុវជនម្នាក់ទៀតបានសម្រេច។

ករណីឃាត់ខ្លួនបានធ្វើឡើងនៅម៉ោង២និង៣០នាទីទៀបភ្លឺ ថ្ងៃទី៩ ខែតុលា ឆ្នាំ២០២១លើកំណាត់ផ្លូវក្រាលកៅស៊ូ ក្នុងភូមិពពូល ឃុំស្វាយចចិប ស្រុកបសេដ្ឋ ខេត្តកំពង់ស្ពឺ

យោងតាមប្រភពរបស់នគរបាលស្រុកបសេដ្ឋបានឱ្យដឹងថាយុវជនជាជនសង្ស័យដែលឃាត់ខ្លួនបានមានឈ្មោះ សាន ម៉េងហ័ង អាយុ១៩ឆ្នាំ រស់នៅក្នុងភូមិសិរីអណ្តែត ឃុំនិទាន ស្រុកបសេដ្ឋ ខេត្តកំពង់ស្ពឺ និងបក្ខពួកពីរនាក់ផ្សេងទៀតដែលបានគេចខ្លួនបាត់មានឈ្មោះ ១- ស៉ឹម រស្មី អាយុ២១ឆ្នាំ រស់នៅជាមួយជនសង្ស័យខាងលើ និង ២- ឈ្មោះ វិន អាយុ២៥ឆ្នាំ មិនស្គាល់ទីលំនៅ៕

នៅចំពោះមុខសមត្ថកិច្ចជនសង្ស័យឈ្មោះ សាន ម៉េងហ័ង បានរៀបរាប់សារភាពឱ្យដឹងថា រូបគេនិងបក្ខពួកប្រដាប់ដោយកាំភ្លើងខ្លីមួយដើមបានជិះម៉ូតូមួយគ្រឿងម៉ាក់ប៊ីត ពណ៌ខៀវលាយស ពាក់ស្លាក់លេខ 1R 3815 ទៅចំនុចខាងលើរងចាំស្ទាក់ប្លន់មិនរើសមុខ គ្រានោះក៏បានឃើញម៉ូតូមួយគ្រឿង ហើយក៏ធ្វើសកម្មភាពភ្ជង់ប្លន់យុវជនម្នាក់ដែលជិះម៉ូតូឌុបគ្នា យកបានម៉ូតូ១គ្រឿង ម៉ាកសង់ពណ៌ក្រហមផលិតឆ្នាំ២០២០ បិទតែមឡើងសេរីឆ្នាំ២០២១ រួចជិះគេចខ្លួន ប៉ុន្តែត្រូវបានកម្លាំងនគរបាលស្ទាក់ចាប់តែម្តង៕

ប្រភពបានបន្តថា÷ ជនរងគ្រោះមានឈ្មោះ យឺន កាលីន ភេទប្រុស អាយុ១៧ឆ្នាំ រស់នៅភូមិត្នោត ឃុំទួលសាលា ស្រុកបសេដ្ឋ ជិះឌុបគ្នាជាមួយឈ្មោះ សុខ ម៉ែន ភេទប្រុស អាយុ២៣ឆ្នាំ រស់នៅភូមិស្វាយរំពារ ឃុំទួលសាលា ស្រុកបសេដ្ឋ៕

ក្រោយមកកម្លាំងជំនាញក៏បានចាប់ឃាត់ខ្លួនយុវជនម្នាក់និងដកហូតបានអាវុធខ្លីកែច្នៃមួយដើមនិងមធ្យោបាយធ្វើសកម្មភាពគឺ ម៉ូតូប៊ីតមួយគ្រឿង និងដកហូតម៉ូតូរបស់ជនរងគ្រោះម៉ាកហុងដាC១២៥ពណ៌ក្រហមពាក់ស្លាកលេខ១ID ៧១៧៩ ប្រគល់ជូនឲ្យជនរង់គ្រោះប់មកវិញផងដែរ៕

បច្ចុប្បន្នជនសង្ស័យកំពុងស្ថិតក្រោមការសាកសួរពីមន្ត្រីនគរបាលជំនាញនៃអធិការដ្ឋានស្រុកបសេដ្ឋដើម្បីកសាងសំណុំរឿងបន្តនីតិវិធី ៕

ចំណែកមុខសញ្ញាជាបក្ខពួកជនសង្ស័យក្នុងករណីប្លន់ សមត្ថកិច្ចកំពុងបើកប្រតិបត្តិការស៉ើបរុករកដើម្បីចាប់ខ្លួនយកមកផ្តន្ទាទោសតាមផ្លូវច្បាប់ ៕