ភ្នំពេញ: ទីតាំងល្បែងជល់មាន់មួយកន្លែងស្ថិតនៅភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ ដែលគេស្គាល់ច្បាស់ថាម្ចាស់ទីតាំងឈ្មោះ ផាន់ ណា ដែលកំពុងតែបើកលេងយ៉ាងអាណាធិបតេយ្យដែលមិនមានសមត្ថកិច្ចរវល់អើពើជាពិសេសប៉ុស្តិ៍រដ្ឋបាលសង្កាត់ស្ទឹងមានជ័យ៣តែម្តង។

ដោយមានសេចក្តីរាយការណ៍ពីពលរដ្ឋបានអោយអ្នកសារព័ត៌មានដឹងថាទីតាំងខាងលើមានល្បែងជល់មាន់ទើបរសៀលថ្ងៃទី១២ ខែវិច្ឆិកា ឆ្នាំ២០២១ អ្នកសារព័ត៌មានបានចុះទៅផ្តិតយករូបភាពក៏បានឃើញមនុស្សមួយក្រុមកំពុងតែដើកាន់កន្ត្រកមាន់ចេញពី ដីឡូត៍មួយកន្លែងស្ថិតនៅទីតាំងខាងលើពិតប្រាកដមែន។

បន្ទាប់មកអ្នកសារព័ត៌មានដែលបានចដល់ទីតាមក៏បានទូរស័ព្ទទៅប៉ុស្តិ៍រដ្ឋបាលសង្កាត់ស្ទឹងមានជ័យ៣តែទូរស័ព្ទជាប់រវល់រហូតបែបនេះមិនដឹងថាទូរស័ព្ទជាប់រវល់មែនឬក៏ចុចបិតពេលដែលឃើញលេខអ្នកសារព័ត៌មាន។

បើយោងតាមសេចក្តីរាយការណ៍របស់ពលរដ្ឋដែលរស់នៅទីតាំងខាងលើបានលើកឡើងបន្តទៀតថារាល់ថ្ងៃនេះពួកគាត់កំពុងតែមានការព្រួយបារម្មណ៍យ៉ាងខ្លាំងចំពោះសេចក្តីសុខ សុវត្ថិភាពក្នុងការរស់នៅរបស់ពួកគាត់ព្រោះពួកគាត់តែងតែគិតថាបើទីតាំងណាមានល្បែងស៊ីសងមិនយូរទេនឹងអាចកើតមានអំពើចោរកម្មផ្សេងៗ។

សូមបញ្ជាក់ផងដែរថាខណៈពេលដែលអ្នកសារព័ត៌មានកំពុងផ្តិតយករូបភាពទីតាំងល្បែងខាងលើស្រាប់តែមានបុរសម្នាក់ចេញមកនិយាយខ្លាំងៗដាក់អ្នកសារព័ត៌មានដោយបានអះអាងថាអ្នកសារព័ត៌មានខឹងយកលុយគេមិនបានបែជាមកឡាយសម្តីទាំងនេះបញ្ជាក់ថាទីតាំងខាងលើនេះពិតជាមានប្រព្រឹត្តល្បែងស៊ីសងជល់មាន់ពិតប្រាកដមែន។

ដូច្នេះសូមសំណូមពរដល់លោក អភិបាលខណ្ឌមានជ័យសូមមេត្តាចាត់វិធានការទប់ស្កាត់នឹងបង្ក្រាបរាល់ល្បែងស៊ីសងទាំងនេះផងដើម្បីសេចក្តីសុខ សុវត្ថិភាពរបស់ពលរដ្ឋក្នុងមូលដ្ឋានជាពិសេសគឺគោរពអោយច្បាប់ភូមិឃុំមានសុវត្ថិភាពទាំង៧ចំណុច៕