ឯកឧត្តម មាស សុភា ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមការងារថ្នាក់ជាតិចុះជួយខេត្តព្រះវិហារ បានអញ្ជើញជាអធិបតីភាពក្នុងពិធីចែកអំណោយជូនដល់បងប្អូនប្រជាពលរដ្ឋមានជីវភាពខ្វះខាតចំនួន ១៥០គ្រួសារ ស្ថិតនៅក្នុងឃុំសង្កែពីរ ស្រុកឆែប ខេត្តព្រះវិហារ ដែលពិធីនេះមានការអញ្ជើញចូលរួមពីសំណាក់ ឯកឧត្តម ប្រាក់ សុវណ្ណ អភិបាលនៃគណៈអភិបាលខេត្តព្រះវិហារ គណៈប្រតិភូអមដំណើរ អភិបាលរងខេត្ត ក្រុមប្រឹក្សាខេត្ត អាជ្ញាធរដែនដីគ្រប់លំដាប់ថ្នាក់ កងកម្លាំងទាំងបី ព្រមទាំងបងប្អូនប្រជាពលរដ្ឋ ស្ថិតនៅក្នុងឃុំសង្កែពីរ ស្រុកឆែប ជាច្រើនរូបផងដែរ ។

ពិធីនេះបានប្រារព្ធធ្វើឡើងនៅក្នុងបរិវេណវត្តទ្រីសុទ្ធារ៉ាម ស្ថិតក្នុងភូមិសំបូរ ឃុំសង្កែពីរ ស្រុកឆែប ខេត្តព្រះវិហារ ។ ចំពោះបងប្អូនប្រជាពលរដ្ឋដែលមានជីវភាពខ្វះខាត បានអញ្ជើញមកទទួលអំណោយនាពេលនេះ រួមមានមកពីភូមិក្រឡោតចំនួន ៦០គ្រួសារ ភូមិសំបូរ ៤៥គ្រួសារ និងភូមិជោគជ័យចំនួន ៤៥គ្រួសារ ដែលភូមិទាំងបីនេះស្ថិតក្នុងឃុំសង្កែពីរ ស្រុកឆែប ខេត្តព្រះវិហារអំណោយដែលទទួលបានរួមមានក្នុងមួយគ្រួសារៗ ទទួលបានអង្ករ ២០គីឡូក្រាម មី ០១កេស ត្រីខ ០១យួរ ទឹកស៊ីអ៊ីវ ០១យូរ ព្រមទាំងថវិកា ០២ម៉ឺនរៀលផងដែរ៕