ក្នុងឱកាសដឹកនាំកិច្ចប្រជុំក្រុមការងាររៀបចំសណ្ដាប់ធ្នាប់ របៀបរៀបរយផ្សាររដ្ឋ និងឯកជន នៅក្នុងភូមិសាស្រ្តក្រុង-ស្រុក នៃខេត្តសៀមរាប តាមរយ:ប្រព័ន្ធវីដេអូ Zoom កាលពីរសៀលថ្ងៃទី០១ ខែវិច្ឆិកា ឆ្នាំ២០២១ម្សិលមិញនេះ លោក នាក់ ណេរ៉ុន អភិបាលរងខេត្ត និងជាប្រធានក្រុមការងារ បានមានប្រសាសន៍ណែនាំឲ្យអាជ្ញាធរក្រុងស្រុកក្នុងទូទាំងខេត្ត ចាត់វិធានការឲ្យបានតឹងរ៉ឹងបន្ថែមទៀត ចំពោះអាជីវករដែលកំពុងលក់ដូរនៅតាមផ្សារ ហើយរកឃើញថាអាជីវកររូបណាដែលមិនគោរព និងមិនអនុវត្តតាមការណែនាំអាជ្ញាធរ ពិសេសបំពានទៅនឹងវិធានការ របស់អាជ្ញាធរខេត្ត ដែលបានណែនាំឲ្យអាជ្ញាធរក្រុង ស្រុក និងគណៈកម្មការផ្សារកន្លងមកនោះ ត្រូវធ្វើការពិន័យទៅតាមច្បាប់ដែលបានដាក់ចេញ និងអនុវត្តកន្លងមកជាដាច់ខាត។

លោក នាក់ ណេរ៉ុន មានប្រសាសន៍ទៀតថា បន្ទាប់ពីស្ថានភាពនៃជំងឺកូវីដ-១៩ នៅក្នុងខេត្តសៀមរាប មានសភាពធូរស្រាល ហើយកន្លងមកអាជ្ញាធរខេត្ត ក៏បានដំណើរការឲ្យផ្សារមួយចំនួនត្រូវបានបើកលក់ឡើងវិញ ទៅតាមគន្លងថ្មី ដែលដាក់ចេញដោយរាជរដ្ឋាភិបាល ក៏ដូចជាអាជ្ញាធរខេត្ត ដើម្បីជួយសម្រួលទៅបញ្ហាជីវភាពប្រចាំថ្ងៃ របស់បងប្អូនប្រជាពលរដ្ឋឡើងវិញ ប៉ុន្តែនៅមានបងប្អូនប្រជាពលរដ្ឋ និងអាជីវករមួយចំនួនតូច នៅមិនទាន់គោរព និងអនុវត្តនៅឡើងចំពោះវិធានការ និងការណែនាំនានា របស់អាជ្ញាធរដែលបានដាក់ចេញ ដោយបងប្អូនអាជីវករខ្លះ នៅតែមានការរៀបចំលក់ដូរប្រជ្រៀតគ្នា គ្មានអនាម័យ មិនបានរៀបចំកន្លែងលក់ដូររបស់ខ្លួន ឲ្យមានរបៀបរៀបរយនៅឡើយ ដែលបញ្ហាតម្រូវឲ្យអាជ្ញាធរ ក៏ដូចជាគណៈកម្មាការគ្រប់គ្រងផ្សារ ត្រូវតែមានការត្រួតពិនិត្យ និងរឹតបន្តឹងបន្ថែមទៀត។

លោកអភិបាលរងខេត្ត បានមានប្រសាសន៍បន្ថែមតថា ក្នុងឱកាសនេះដែរ សូមឲ្យអាជ្ញាធរក្រុងស្រុក និងគណៈកម្មការគ្រប់គ្រងផ្សារ ត្រូវតាមដាន និងស្រង់ទិន្ន័យចំនួនអាជីវករនៅតាមតំបន់ដែលខ្លួនគ្រប់គ្រង ឲ្យបានច្បាស់លាស់ជាប្រចាំ ដើម្បីធ្វើការពិនិត្យទៅលើបងប្អូនអាជីវកររូបណាដែលអាចមានផ្ទុកជំងឺកូវីដ-១៩ ក្នុងនោះចំពោះអាជីវករដែលមិនបានចាក់វ៉ាក់សាំង និងមិនបានធ្វើតេស្ត គឺមិនអនុញ្ញាតឲ្យចូលលក់នៅក្នុងផ្សារជាដាច់ខាត ពិសេសនៅតាមផ្សារត្រូវបង្កើត QR Code និងតូបលក់ដូរនីមួយៗ គឺដើម្បីបង្កភាពងាយស្រួលដល់ក្រុមការងារគ្រប់គ្រងតាមដានស្ថានភាពនៃជំងឺកូវីដ-១៩ ងាយស្រួលក្នុងការស្វែងរក និងកំណត់តូប ឬទីតាំងពាក់ព័ន្ធ ដើម្បីជៀសវាងការបិទផ្សារទាំងមូល ក្នុងករណីមានជួបប្រទះករណីឆ្លងជាយថាហេតុនោះ ដែលនេះគឺជាយន្តការថ្មីមួយទៀត ជួយសម្រួលឲ្យអាជីវកម្មផ្តល់កិច្ចសហការជាមួយក្រុមការងារ បង្កើនភាពរហ័សទាន់សភាពការណ៍ ក្នុងការស្វែងរកអ្នកដែលពាក់ព័ន្ធ។

លោក នាក់ ណេរ៉ុន អភិបាលរងខេត្ត បានមានប្រសាសន៍បន្ថែមទៀតថា បច្ចុប្បន្ននេះអត្រាភាគរយនៃចំនួនប្រជាជនក្នុងខេត្តសៀមរាប ដែលទទួលបានការចាក់វ៉ាក់សាំងបង្ការជំងឺកូវីដ-១៩ គឺជាភាពកក់ក្តៅមួយដែលជំរុញឲ្យរដ្ឋបាលខេត្ត មានសេចក្តីក្លាហានក្នុងការប្រើប្រាស់យន្តការ បង្ហើបឲ្យមានដង្ហើមនៃចរន្តសេដ្ឋកិច្ចឡើងវិញ ដោយចាប់ផ្តើមពីជីវភាពរស់នៅប្រជាំថ្ងៃរបស់គ្រួសារប្រជាពលរដ្ឋ និងសហគមន៍ ក្នុងនោះការរៀនរស់ជាមួយកូវីដ-១៩ គឺជាកម្រាលផ្លូវឆ្ពោះទៅរកគោលដៅមួយ ដែលនៅទីនោះយើងនឹងអាចនិយាយបានថា កូវីដ-១៩ វាគ្រាន់តែជាវិបត្តិមេរៀនរបស់អតីតកាលតែប៉ុណ្ណោះ៕