ខេត្តសៀមរាប ៖ ហេតុការណ៍នេះបានកើតឡើង លើផ្លូវជាតិលេខ ៦ ស្ថិតនៅភូមិត្រពាំងច្រាំង ឃុំក្រឡាញ់ ស្រុកក្រឡាញ់ ខេត្តសៀមរាប ហេតុការណ៍នេះបានកើតឡើងនៅថ្ងៃទី ១៤ ខែឧសភា ឆ្នាំ ២០២២ វេលាម៉ោង ៤ និង ០០ ។

មុនពេលកើតហេតុ មានរថយន្តធំមួយគ្រឿង ម៉ាក HYUNDAl ពាក់ស្លាកលេខ តាកែវ 3A.1465 ពណ៌បៃតង.ស បើកបរដោយឈ្មោះមិនស្គាល់អត្តសញ្ញាណ ក្នុងទិសដៅពីលិចទៅកើត បានបុករថយន្តម៉ាក TOYOTA CAMRY (ច្នៃទ្រុង) ពណ៌ឈាមជ្រូក ពាក់ស្លាកលេខ ច8738 ភព2 បើកបរដោយឈ្មោះ សាក់ តេង ភេទប្រុស អាយុ ៤០ឆ្នាំ រស់នៅភូមិប្រឡាយហ្លួងក្រោម ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ និងអ្នកជិះជាមួយឈ្មោះ ភក្រ័ ភេទប្រុស អាយុ ៣៨ ឆ្នាំ រស់នៅភូមិជាមួយគ្នា ទិសដៅពីកើតទៅលិច។

ករណីនេះ បណ្ដាលឲ្យស្លាប់ឈ្មោះ ភក្រ័ និងឈ្មោះ សាក់ តេង ក៏បានស្លាប់បាត់បង់ជីវិតក្រោយពីបញ្ជូនទៅមន្ទីរពេទ្យបង្អែកខេត្តសៀមរាប ព្រមទាំងខូចខាតរថយន្តធំ ១គ្រឿង(ស្រាល) និងរថយន្តតូច ១ គ្រឿង (ធ្ងន់)។

មូលហេតុគ្រោះថ្នាក់ចរាចរណ៍បណ្ដាលមកពីអ្នកបើកបររថយន្តតូចបើកមិនប្រកាន់ស្ដាំ ក្រោយពេលកើតហេតុរួច កម្លាំងជំនាញ បានចុះដល់កន្លែងកើតហេតុ និងពិនិត្យកន្លែងកើតហេតុ ប្រមូលវត្ថុតាងទាំងពីរគ្រឿង យកមករក្សាទុកនៅអធិការដ្ឋាននគរបាលស្រុកក្រឡាញ់ ខេត្តសៀមរាប ដើម្បីចាត់ការតាមនីតិវិធីច្បាប៕