ខេត្តបន្ទាយមានជ័យ ៖ ដើម្បីជួយសម្រួល ដល់បងប្អូនប្រជាពលរដ្ឋ អាជីវករ ផ្សារថៃ អាជ្ញាធរខេត្តបន្ទាយមានជ័យ បានរៀបចំនូវទីតាំងទទួលធ្វើប័ណ្ណព្រំដែន ចំនួន២កន្លែង ដើម្បីបង្កភាពងាយស្រួល ដល់ប្រជាពលរដ្ឋទៅទទួលសេវានេះ បន្ទាប់ពីអាជ្ញាធរនៃប្រទេសថៃ បានបើកច្រកព្រំដែនឡើងវិញ ដើម្បីឲ្យពលរដ្ឋអាចឆ្លងដែនចេញចូលកម្ពុជា-ថៃ ប៉ុន្តែត្រូវបំពេញកាតព្វកិច្ចមួយចំនួន ។

អាជ្ញាធរក្រុងប៉ោយប៉ែត ក៏ដូចជា ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានឱ្យដឹង នៅព្រឹកថ្ងៃទី៤ ខែឧសភា ឆ្នាំ២០២២នេះថា ដើម្បីសម្រួលដល់​ការ​ធ្វើ​ឯកសារ​ធ្វើប័ណ្ណព្រំដែននេះ រដ្ឋបាលខេត្ត បានបង្កើននូវកម្លាំង ប្រចាំការ​នៅច្រក​ចេញ​ចូលតែមួយ​ក្នុងសាលាខេត្ត ដើម្បីជំរុញការផលិតទទួលពាក្យបណ្ដឹង រួមទាំង​សម្រប​សម្រួល​បំពេញ​ឯកសារ ។

ឯកឧត្តមបានបន្តថា រដ្ឋបាលខេត្តក៏បានរៀបចំទីតាំងមួយទៀត នៅច្រកចេញ​ចូលតែមួយ​ក្នុង​ក្រុង​ប៉ោយប៉ែត ដើម្បីសម្របសម្រួលឲ្យពលរដ្ឋនៅក្រុងប៉ោយប៉ែត មិនចាំបាច់ឡើងទៅទីរួមខេត្ត ដោយ​រដ្ឋបាលខេត្តបានបង្កើតក្រុមការងារ ទទួលពាក្យស្នើសុំធ្វើប័ណ្ណព្រំដែន បើទោះបីមាន​ការហត់​នឿយ ប៉ុន្តែធ្វើយ៉ាងណា ធ្វើប័ណ្ណព្រំដែនពលរដ្ឋ ឲ្យបានទាន់ពេលវេលា ។

ឯកឧត្តម អ៊ុំ រាត្រី បានបញ្ជាក់ថា ចាប់តាំងពីអាជ្ញាធរថៃ បានបើកច្រកទ្វារ​ព្រំដែន​អន្តរជាតិ​ប៉ោយប៉ែត​ឡើងវិញ គិតត្រឹមថ្ងៃទី៣ ខែឧសភា មានពលរដ្ឋទៅស្នើសុំធ្វើប័ណ្ណព្រំដែន មានជាង ៥០០នាក់ហើយ ។

គួរបញ្ជាក់ថា អាជ្ញាធរថៃ បានសម្រេចបើកច្រកទ្វារព្រំដែនឡើងវិញជាមួយកម្ពុជា ចាប់ពីថ្ងៃទី១ ខែឧសភា ឆ្នាំ២០២២ មានច្រកទ្វារអន្តរជាតិប៉ោយប៉ែត ស្ថិតក្នុងខេត្តបន្ទាយមានជ័យ ដោយ​ពលរដ្ឋ​​អាច​ធ្វើ​ដំណើរ​ឆ្លង​ដែន​ចេញចូលឡើងវិញ ប៉ុន្តែត្រូវភ្ជាប់ជាមួយនូវលិខិតឆ្លងដែន (ប៉ាស្ព័រ), ប័ណ្ណព្រំដែន (ប័ណ្ណវ័តធឺផាក់) រួមទាំងមានប័ណ្ណបញ្ជាក់​ការចាក់វ៉ាក់សាំង​កូវីដ១៩ ផងដែរ ៕