សៀមរាប៖រថយន្ត Toyota Tundra ពណ៌ប្រផេះក្រម៉ៅ ស្លាកលេខ កម្ពុជា H.E.RITH ដែលគេស្គាល់ថា ជារបស់លោក សឹង្ហ សំរឹទ្ធិ អនុប្រធានចយក១៥៧សាខាខេត្តសៀមរាប និងជាថៅកែហាងបញ្ចាំ ដ៏ល្បីល្បាញនៅខេត្តសៀមរាប បានប៉ះគ្នាជាមួយ ម៉ូតូ Honda Dream សេ 125 ពណ៌ខ្មៅស្លាកលេខសៀមរាប 1AF-8928។

នៅក្នុងហេតុការណ៍ខាងលើ ក៏មានមន្ត្រីនគរបាលចរាចរណ៍មួយរូប បានព្យាយាមមិនឲ្យ អ្នកសារព័ត៌មានផ្សាយ ដោយលោកមានប្រសាសន៍មក អ្នករាយការណ៍ព័ត៌មាន របស់អង្គភាពសារព័ត៌មាន ឱ្យសួររូបលោកសិន មុននឹងធ្វើការផ្សាយ។

គ្រោះថ្នាក់ចរាចរណ៍នេះ កើតឡើងនៅតាម បណ្ដោយផ្លូវ សាលដឺហ្គោល កែងជាមួយផ្លូវ សម្ដេចវិបុលបញ្ញា សុខ អាន (ផ្លូវ 60ម៉ែត្រ) ត្រង់ចំណុច ខាងមុខមន្ទីរពេទ្យគន្ធបុប្ផា(ជ័យវរ្ម័នទី ៧) ស្ថិតក្នុងភូមិមណ្ឌល3 សង្កាត់ស្លក្រាម ក្រុងសៀមរាប ខេត្តសៀមរាប នៅវេលាម៉ោង ១៩នឹង៤៥ នាទី ថ្ងៃទី ១៩ ខែសីហា ឆ្នាំ ២០២២។

ករណីនេះបានបណ្ដាលឱ្យរងការខូចខាតរថយន្ត 01គ្រឿង និងម៉ូតូ 01គ្រឿង ហើយបណ្ដាលអោយ យុវជនម្នាក់រងរបួសស្រាលផងដែរ។

សូមបញ្ជាក់ថា៖ លោក សឹង្ហ សំរឹទ្ធិ មិនបានធ្វើការបកស្រាយ ពាក់ព័ន្ធករណីនេះឡើយ ដោយលោកមានប្រសាសន៍ថា «អត់មានមកមិច ជាមួយនឹងខ្ញុំទេ បើសមត្ថកិច្ចគេប្រាប់ មិចលោកឯងមិនស្ដាប់»។

ទោះបីយ៉ាងណា សមត្ថកិច្ច មិនអាចបញ្ជាក់ អំពីមូលហេតុ បាននៅឡើយទេ៕